昨日黄花香犹在伊些手握信纸信封个岁月
昨日黄花香犹在——伊些手握信纸信封个岁月原创章宜娟海上梦叠
来源：旅游时报
作者：章宜娟
沪语改写、讲述：朱友好
审阅、推荐：丁迪蒙
编辑：王乙其
勒勒以纳米级速度，电子传送文字信息个今朝，用纸张搭笔写信寄信，已经成为昨日黄花。不过，对于我来讲，黄花香还勒勒海。
一、从前个信纸、信封搭邮筒
上世纪60年代，屋里电话还呒没普及。人搭人个交流大多数集中勒单位、学堂或者邻舍隔壁。勿像现在呒没事体就约勒吃饭，吃杯咖啡，一眼也呒没距离感。不过伊个辰光也有茶馆个。记忆里向，伊面到处是祖辈个喧闹声。
假使要对某些勿好常庄见面个人表达自家个想法，讲讲心里闲话，写信就是首选了。马路边浪弄堂口个邮筒，就是鸿雁传书个“绿娘”。
写信用个纸头，有得几种来源：顶端用红颜色注明单位抬头个信纸，也叫报告纸，单位是用来写报告个，我用过上海手表厂搭仔工商银行信纸。也好到文具用品商店去买，印有横线个白纸，纸头比现在个A4纸要小一眼，质量勿同，有薄有厚。写信阿拉一般用钢笔，显得比较庄重、礼貌。
写好信以后，按照信封个大小，拿信纸折叠好摆到信封里去。勒信封正面个当中位置，按照收信人个地址、姓名个顺序，用钢笔分两行写。信封右下角，是寄信人个地址姓名，搿也是碰到“查无此人”之后个退件地址，最后，勒信封个右上角指定位置贴好邮票，跑到马路口，拿信厾到邮筒里去。
伊个辰光个邮筒大概有一个人搿能高，绿颜色个圆顶檐帽下头有一道横过来长长个口，像“嘴巴”一样，拿各种信件“吞”进去。下头有每日天开锁取件个辰光表，一日天4趟，还带几点几分唻。记得，有趟一道白相个小朋友，勿相信邮递员会得介准时，乃末，阿拉选了一个上半日10点零8分个辰光打赌。眼看零6、零7分了，还呒没看到邮递员过来，表浪向个数字会得勿算数伐？就勒零8分个一刹那，一声叮铃铃，一个绿颜色身影准时出现了邮筒门前，熟练个打开靠近地面个小门，拿出里向个信件之后，再拿门锁牢，又是一声叮铃铃、走脱了。哈哈，为了迭桩事体我还赢到一块糖唻。
伊歇辰光，寄信个邮票分平邮搭航邮两种。本埠平邮邮票4分。假使寄到外埠是8分。假使还要快，可以选择寄航空信件。
二、信箱搭收信叫个声音
埃歇横里呒没独家信箱，假使侬是靠近马路边浪个房子，来信就会得摆勒屋里门口头个台阶浪。伊歇辰光，我住勒一幢四层楼个房子里，邮递员是勿会走到楼浪向来送信个。底楼进门右边有堵墙，勿晓得阿里位手巧个邻居，用木条做了只架子，厚度差勿多是一只食指，高度大约摸四分之一报纸搿能大，正面用两根木条板横勒海。迭只架子拨做成斜口，贴墙一面稍微高一眼，搭前头个木条之间有了落差，搿能介，邮递员送报纸、报刊搭信件就邪气方便个摆进去了，比现在个小区信箱好得多。伊歇辰光，底楼住勒位老太，阿拉叫伊阿娘。听讲解放前头阿娘是撑船个，要喊号子，一口浓浓个本地乡音，只要伊一喊，楼浪楼下侪听得到。就晓得啥人家报纸来了，啥人家有信了。
大楼里除脱我，老少有人关心来信个事体。每趟我听到阿娘勒喊：“四层楼章家，屋里有信来唻”，或者讲“阿玲啊，下来收信唻”，我总归是第一个冲到楼下头，拿出所有个报纸，一家一家送到邻居屋里个门口。假使看到有我个信，就会得蛮开心个寻只安静个角落慢慢叫读。现在想想，当时阿娘个声音有得多少个亲切。
三、赏“封”读信个温暖回忆
埃歇横里个人老注重信封浪个字，除脱仔端正，还要写得漂亮。我爸爸写个钢笔字清秀挺拔。我也邪气欢喜外公写个信封。老人有得民国派头，用小楷毛笔写，从右向左个竖版信封有眼古代人个味道。最勿欢喜个是有人勒信封浪写“内详”。
阿姐从农场写信来是寄拨爷娘个，但是每趟勒信里向总归有一两句关照我搭阿哥，要好好叫做功课搿能介个闲话，我搭阿哥就像煞商量好了一样，会讲：真是啰嗦。
我永远勿会忘记脱父亲曾经寄拨我个信。只要我出差勒外头，就有抵万金个家书。读信开头个“娟儿”，我心里邪气温暖。父亲还会得勒落款个地方写：父/尧。
现在，几十年过去了，我还是有写信个习惯，譬如搭囡儿之间。勿一样个是，我勿用信封、信纸，而是写勒明信片浪。我欢喜看邮戳浪个岁月留痕，欢喜笔墨嵌勒卡片浪个伊股代表心情个力量。
作者：章宜娟
讲述者：朱友好
—————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《昨日黄花香犹在——伊些手握信纸信封个岁月》
转载请注明：http://www.jingtiao123.com/jcyjwzl/10662.html
